Книгата „Американски сон“ промовирана во Ресен, Македонија

– декември 28, 2024внесено во: Култура и Уметност

Во малата сала на Општина Ресен, Република Македонија, се одржа промоцијата на книгата „Американскиот сон“ од авторот Ерис Руси, која ја раскажува неверојатната животна приказна на Беќир Потка – патување од пеколот на комунистичка Албанија до остварувањето на американскиот сон.

На овој посебен настан присуствуваа ученици од средното училиште „Цар Самоил“ од Ресен, наставниот кадар и љубители на книгата. За книгата зборуваа авторот Ерис Руси и Јонела Спахо, деканка на Факултетот за образование и филологија при Универзитетот „Фан Ноли“ во Корча, споделувајќи длабоки размисли за силата на човечкиот дух.

Приказната на Беќир Потка е сведоштво за храброста и истрајноста. Во 1989 година, на само 23-годишна возраст, тој донел одлука што му го променила животот засекогаш: избегал од изолираната Албанија, поминал безброј перипетии во бегалските кампови во Грција и потоа изградил нов живот во Соединетите Американски Држави.

Пораката на Беќир Потка до сите млади е инспиративна:
„Еден човек може да успее во секоја ситуација, само преку истрајност и добри цели.“

Одговарајќи на прашањата на младите, Беќир Потка ги охрабри да се осмелат, да бидат истрајни и да ги следат своите соништа, велејќи:
„Изградете го вашиот живот и живејте со големата вистина што ја носите во себе!“

Промоција која останува во мислите и срцето – повик за слобода, храброст и непокорлив дух!

Васил Стерјовски