Во Церје, Македонците од Мала Преспа, го одбележаа празникот Голема Богородица

– август 28, 2024внесено во: Актуелно

Според традицијата негувана со векови, во селото Церје, Македонците од Мала Преспа, го одбележаа денешниот голем празник Успение на Пресвета Богородица, патрон на селската црква.

Иако поголемиот број жители од Церје се иселени, сепак за нив и нивните поколенија важи изреката „каде и да се за овој голем празник во Церје да се“. Секако заедно со нив беа и жители од повеќе села на Мала Преспа.

По богослужбата што во црквата „Успение на Пресвета Богородица“ ја одржа отец Ропи Арѓири, одбележувањето продолжи со настапот со македонски песни на пејачот од Мала Преспа, Кристијан Ѓорѓи.

-Поради лошите, речиси никакви услови за живот, повеќето од некогашните жители на селото се иселивме во други градови во Албанија, пред сè во Корча, како и во Македонија и Грција, но секогаш за овој празник сме тука, да се сретнеме, да се видиме и да се потсетиме на спомените од времето кога селото беше преполно од народ. Секоја година доаѓаме за прослава на овој голем ден кој е селска слава, велат жителите кои живеат надвор од него.

Присутните во овој божји храм, кој датира од 1012 година, запалија свеќи и посакаа здравје, среќа и бериќет, а од Мајката Божја „да ги чува и штити од секакво зло Македонците каде и да се“.

©Македониум