ИСТОРИСКИ ВИДЕОСНИМКИ ОД ПОКРСТУВАЊЕТО НА МАКЕДОНЦИТЕ ВО МАЛА ПРЕСПА ВО 1991 ГОДИНА

Весник Македониум пренесува историска видео снимки од Велигден 1991 година, снимка која сведочи за возобновувањето на верскиот живот на Македонците во Мала Преспа, кога Преспанско-пелагонискиот митрополит Петар остварил посета на овој дел од Албанија и во текот на еден ден покрстил стотици Македонци од регионот.

По падот на комунистичкиот режим во Албанија и отворањето на границите со Република Македонија, започнал процесот на повторно воспоставување на верските врски меѓу православните Македонци во Албанија и Македонската православна црква. Во тој период, митрополитот Петар презел повеќе мисии насочени кон воведување во верата и обновување на православниот црковен живот меѓу Македонците во Албанија.

Посетата на Мала Преспа за Велигден во 1991 година претставува еден од значајните моменти во овој процес. Стотици Македонци од овој регион ја искористиле можноста да ги примат светите тајни на православната црква, во време кога, по децении комунистичко владеење и забрана на верскиот живот, повторно се отворале можностите за слободно практикување на верата.

Во почетокот на 1990-тите години, митрополитот Петар остварил повеќе мисии за возобновување на црковниот живот на православните Македонци во Мала Преспа, Голо Брдо и Врбник. Неговата активност опфаќала и иницијативи за реконструкција на запуштените и разрушени црковни храмови, обука на свештенослужители во Мала Преспа, како и поттикнување на преведувачката дејност и подготовката на црковни книги на македонски јазик.

Овие активности имале важно значење за обновувањето на духовниот живот на македонската заедница во Албанија, како и за зачувувањето на нејзиниот верски и културен идентитет во периодот на големите општествени и политички промени во земјата.

Видеоснимките од покрстувањето на Македонците во Мала Преспа во 1991 година претставуваат драгоцено визуелно сведоштво за едно значајно поглавје од поновата историја на Македонците во Албанија.

Овој вреден видео запис го направил Гоце Петревски од Битола, кој ги овековечил настаните од тој период и оставил значаен документ за идните генерации.

Снимките денес имаат историска и документарна вредност, бидејќи сведочат за обновувањето на верскиот живот, повторното воспоставување на духовните врски со Македонија и стремежот на Македонците во Албанија да ги зачуваат своите традиции, вера и национален идентитет.

Нивното објавување претставува можност пошироката јавност повторно да се потсети на настаните од почетокот на 1990-тите години, кога по долг период на изолација започна нова етапа во животот на македонската заедница во Албанија.

©Македониум