МАЕИ: Да се почитува македонскиот јазик на територијата на Општина Пустец

– февруари 2, 2024внесено во: Политика

Партијата Македонска алијанса за европска интеграција, (МАЕИ) силно изразува незадоволство и загриженост поради непочитувањето на македонскиот јазик во јавните активности во Општина Пустец.

Денешната активност организирана од Национална агенција за заштитени подрачја во Општина Пустец, при одбележувањето на 24-годишнината од основањето на Националниот парк Преспа, каде што информациите и банерот беа претставени исклучиво на албански јазик, претставува непочитување на јазичните права на македонското население во оваа област.

Општина Пустец е населена со 100 % македонско население, кое што е признато од албанската држава и каде што македонскиот јазик е еднакво признаен и треба да се користи во службени и јавни контексти. Игнорирањето на македонскиот јазик во официјалните активности, особено во регион каде што македонското население претставува значително мнозинство, е директно кршење на нивните законски и уставно заштитени права.

Во согласност со Уставот на Република Албанија, Рамковната конвенција за заштита на националните малцинства и законот бр. 96/2017 “За заштита на правата на националните малцинства во Република Албанија”, бараме од сите институции и организации кои работат на територијата на Општина Пустец да го почитуваат, промовираат и употребуваат македонскиот јазик.

Исто така, очекуваме од Општина Пустец да ги спроведе потребните мерки за да осигура дека сите активности на нејзината територија ги отсликуваат јазичните права и културните особености на македонската заедница, во согласност со потпишаниот Меморандум за разбирање од 2005 година. Со овој Меморандумот потпишан помеѓу префектурата Корча и општина Пустец „За соработка на полето на заштитата и почитувањето на правата на малцинствата во Албанија“, во ноември 2005 година, општина Пустец се обврзува да создаде соодветни услови, да преземе мерки за зачувување и развој на националниот културен и верски идентитет на македонското малцинство, преку развој на различни активности поврзани со историјата, културата на македонското национално малцинство во општина Пустец, округот Корча итн.

Во името на културната и јазичната разноликост, апелираме за итно и одлучно дејствување со цел да се заштитат и почитуваат правата на македонската заедница во Општина Пустец, кои се темел на демократските вредности и европската интеграција на овој регион.

https://maei.al/archives/3402?fbclid=IwAR1eOdqes6_XHnZHgBWfL8pUgvgRC1KVGvFEx4u2MJ25YpCXvAcuvOAGgZM