ТВ Корча емитуваше прилог за активноста на Македонското друштво „Сонце“, реализирана во градот Корча, посветена на зачувувањето и промовирањето на етнокултурното наследство на националните малцинства во Корчанскиот округ.

Во рамките на активноста беа претставени четири реконструирани традиционални народни носии на македонската, ромската, влашката и египетската заедница. Носиите, од кои дел речиси целосно исчезнале во текот на XX век, беа реконструирани врз основа на стари фотографии, со посебно внимание на зачувувањето на нивниот автентичен изглед и традиционалните елементи.
Прилогот на ТВ Корча го истакнува значењето на оваа иницијатива за зачувување на културниот идентитет и традицијата на националните малцинства, како и можноста реконструираните носии повторно да се користат од заедниците за време на празници, културни манифестации и други традиционални настани.
Активноста беше поддржана од Комитетот за национални малцинства, а во реконструкцијата на носиите посебен придонес даде костимографката Лирика Појани.
Во рамките на настанот беше промовирана и информативната брошура „Етнокултурното наследство на Македонците, Ромите, Власите и Египќаните во Корчанскиот округ“, подготвена од Васил Стерјовски, која ја обработува историјата, културното значење и идентитетските особености на традиционалните носии на овие заедници.
Со оваа иницијатива, Македонското друштво „Сонце“ продолжува да придонесува кон зачувувањето, документирањето и промовирањето на културното наследство и традициите на националните малцинства во Албанија.
©Македониум
