Иницирана соработка меѓу Универзитетите „Гоце Делчев“ од Штип и „Александер Мојсиу“ од Драч

– јануари 31, 2024внесено во: Политика

Во рамките на програмските задачи на Амбасадата, во делот на соработката од областа на високото образование македонскиот амбасадор во Тирана, Данчо Марковски денес имаше работна средба со проф. д-р Каснела Сотирофски, ректор на Универзитетот „Александар Мојсиу“ во Драч.

На разговорот беа разгледани можностите за воспоставување соработка помеѓу универзитетот во Драч и Универзитетот „Гоце Делчев“ од Штип, по претходно извршените консултации со ректорската управа.

Марковски ја истакнал важноста од вклучување на двата универзитети низ заеднички наставни програми коишто ќе бидат компатибилни и суштински ќе одговараат на потребите на пазарот на трудот, што е од основен интерес на студентите.

Посебно бил истакнат интересот за заеднички настап на двата универзитета пред одредени европски универзитети со цел обезбедување меѓународни образовни програми и проекти за обука, кои ќе обезбедат максимални можности за градење меѓународни искуства за учење и обезбедување признавање на двојни дипломи.

Ректорот Ксанела Сотирофски, чие потекло е од с. Церје – Мала Преспа, го поздравила отворањето на лекторатот по македонски јазик на Факултетот за странски јазици, оценувајќи го како важна карика во образованието на Македонското национално малцинство, но и пошироко за сите заинтересирани студенти како придонес во натамошното градење на пријателските односи меѓу двете држави и народи.

На состанокот било договорено Амбасадата во Тирана да овозможи еднодневна практична настава за студентите од Факултетот за политичко правни науки, а амбасадорот да одржи предавање пред студентите и професорскиот кадар на универзитетот.

©Македониум