Во Глобочени, Мала Преспа ќе се постави биста на писателот Стерјо Спасе

– август 6, 2014внесено во: Култура и Уметност

Општина Пустец, ќе постави биста на големиот македонски писател Стерјо Спасе во неговото родно село Глобочени. Бистата ќе биде откриена на 14 август по повод 100-годишнината од раѓањето на Стерјо Спасе.


Освен поставувањето на бистата, Општина Пустец во чест на Стерјо Спасе ќе организира и Македонски фолклорен фестивал “ПРЕСПА 2014” во с.Глобочени, каде ќе настапат фолклорни групи од Мала Преспа.

Поставувањето на бистата и фолклорниот фестивал во чест на Стерјо Спасе ќе започнат на 14 август во 10.30 часот во с.Глобочени, Мала Преспа.

Бистата на Стерјо Спасе е донација на Минчо Јорданов, додека неа бесплатно ја изработи авторката Валентина Стефановска.

Стерјо Спасе е роден во селото Глобочени, во Мала Преспа, 1914 година, а е починат во Тирана, 1989 година. Тој е познат писател со македонско потекло и е еден од најзначајните претставници на современата албанска литература. Познат е и како антологичар, преведувач, учебникар и собирач на македонски народни умотворби во Мала Преспа. (Makedonium)