Груевски: Македонскиот народ нема да прифати да биде преименуван

– септември 29, 2013внесено во: Македонија

Светската организација не смее да седи со скрстени раце.Обединетите Нации не смеат да не го гледаат прекршувањето на фундаментално човеково право за самоименување и треба да покажат одговорност за решавање на предизвиците во регионот и да и овозможат на Македонија да се одглават од оваа ситуација.

20-годишнината од членството во ОН Република Македонија ја дочека со сè уште нерешено прашање во однос на употребата на името на мојата земја и прашањето околу идентитетот на мојот народ – македонскиот идентитет. Овие прашања се појавија поради спор што го отвори нашиот јужен сосед, Грција, кој се противи на нашето именување, кое е наше суштинско индивидуално и колективно право.

Ова во својот говор пред 68-то Генерално собрание на ОН во Њујорк го кажа премиерот на Република Македонија Никола Груевски.

„Република Македонија, согласно со меѓународното право, има право да се самоименува и да го именува својот идентитет како македонски. Македонскиот народ никогаш нема да прифати да биде преименуван. Ако ова прашање не може да се реши сега, иако ние сме најзаинтересирани за негово решавање и искрено посакуваме решение што ќе биде одржливо, балансирано и најбитно, заемно прифатливо, тогаш некоја друга генерација, во поинакви околности, ќе може да го реши, ама токму врз база на вредностите, позициите и принципите што претходно ги наведов, а кои говорат за праведно и правично решение, без победници и поразени. Но лично сметам дека ние не смееме да им ги оставаме жешките теми на идните генерации, туку мора да се обидуваме да најдеме решение и да собереме сили да обезбедиме просперитет за државите и за регионот“, рече Груевски.

Тој се согласи дека решавањето на разликите со јужниот сосед е македонски приоритет, но тоа мора да се реши само во рамките на границите на резолуциите на ОН што го дефинираат решението кое е предмет на разговори и заемно прифатливото решение, и никако на друг начин, а особено никако со проширување на тие граници.

„Шеесет и шест години по Универзалната декларација за човековите права, со овој спор, кој ни е неправедно наметнат од Грција, се повредува и едно од фундаменталните права на поединецот, правото на самоименување. На секој припадник на мојот народ му е оспорено правото да се именува онака како што се чувствува, онака како што се именувале и чувствувале неговите мајка и татко, баба и дедо, и сите други предци во историјата – како Македонец. Грција покрај тоа што го оспорува уставното име на мојата земја Република Македонија, го оспорува и идентитетот на моите граѓани, односно не дозволува тие да се нарекуваат Македонци, а јазикот кој го говорат да се нарекува македонски, иако уште од пред повеќе од половина век по универзитетите на светот има катедри на кои се изучува македонскиот јазик и тој се именува како македонски јазик. Тоа е како некој да ви оспорува дека говорите француски, германски, полски, англиски, холандски, португалски, јапонски, индиски и други јазици“, рече Никола Груевски. (Македониум)