МАЕИ стана полноправна членка на Европската слободна алијанса ЕФА

– mars 13, 2024Postuar në: Politika

Единствената македонска партија во Албанија, Македонска алијанса за европска интеграција, МАЕИ, стана полноправна членка на Европската слободна алијанса ЕФА, за што е донесена едногласна одлука од делегатите на Генералното собрание на Европската слободна алијанса во Брисел.

Лидерот на Македонска алијанса за европска интеграција, Васил Стерјовски, имаше обраќање на Генералното собрание на Европската слободна алијанса.

Тој направи пресек на историјатот на партијата формирана на 8 јуни 2005 година, која, според албанскиот закон за политички партии, е единствен претставник на Македонците во Албанија, оценувајќи при тоа дека партијата е силен поборник за правата на Македонците во Албанија.

– Ние Македонците стоиме обединети, без разлика на религија, регион или социо-културно потекло. Нашата работа строго се придржува кон Уставот на Албанија, со цврста посветеност на демократските принципи, културната различност, малцинските права и економскиот развој. Основен принцип на нашата партија е заштитата и застапувањето на социјалните, политичките и етнокултурните интереси на албанските граѓани од македонска националност, зачувувајќи го нашиот јазик, традиции и наследство – рекол Стерјовски.

Додал дека МАЕИ е посветена на поттикнување на соработката со другите малцинства во Албанија, почитувајќи ги и поддржувајќи ги нивните етнички права, јазик и култура.

– Камен-темелник на нашата мисија е застапување за интеграција на Албанија во евроатлантските структури, исполнување и надминување на евроатлантските стандарди во сите аспекти на општеството и државното управување. Нашите приоритети вклучуваат поддршка на основните човекови права, поттикнување на мултиетничко, мултикултурно албанско општество врз основа на правото и правдата, употреба на меѓународни конвенции и застапување за напредно законодавство за правата на малцинствата – посочил тој.

Социјалната база на нашата партија, посочил Стерјовски, го опфаќа македонското население во Албанија и граѓаните кои се залагаат за правда и еднакви права за сите малцинства, нагласувајќи дека имаат воспоставено партнерства со албанските, балканските и европските политички партии, организациите кои се борат за човековите и малцинските права и евроатлантските структури посветени на овие фундаментални принципи.

– Политичката програма на нашата партија е длабоко вкоренета во инклузивноста, човековите права и заштитата на малцинствата. Ние се стремиме да негуваме порамноправно, разновидно и интегрирано општество во Албанија и поширокиот европски контекст. Македонците во Република Албанија се лојални граѓани, но ние остануваме гордо поврзани со нашето македонско наследство, јазик и традиции. Нашата партија, позиционирана во центарот на политичкиот спектар, е цврста во заштитата на македонскиот идентитет, култура, јазик и традиции во Република Албанија – рекол тој.

Нагласил дека од самото основање, МАЕИ, покажала значајно политичко присуство во различни локални, регионални и национални владини структури и албанскиот парламент.

Европската слободна алијанса ЕФА е партија која што ги претставува малцинствата во Европскиот парламент. Македонска алијанса за европска интеграција е единствена партија од Албанија која што членува во Европската слободна алијанса.

©Македониум