Македонците од Албанија го одбележаа патронот на манастирот Света Марена во Туминец, областа Мала Преспа

– gusht 9, 2022Postuar në: Shqipëria

Во селото Туминец, Мала Преспа, на 30 јули 2022 година се одбележа патронот на манастирот Света Марена, празник кој Македонците во Мала Преспа, традиционално го слават заедно и каде и да се иселени тие за овој празник се тука.

По повод празникот посветен на Света великомаченица Марина – Марена – Огнена Марија, како и изминатите години, одбележувањето почна на 29-ти јули 2022 година кога во дворот на манастирот до доцна во ноќта се виеше македонско оро и се пееја македонски песни.

По богослужбата што ја одржаа свештениците Алексо Темелко и Ропи Арѓири и двајцата Македонци од Мала Преспа, верниците продолжија со одбележувањето.

И оваа година на манастирската слава дојдоа голем број Македонци од Албанија и Македонија.

Од негово и од име на Македонска алијанса за европска интеграција празникот го честиташе партискиот лидер Васил Стерјовски.

Честит и вековит да ни е денешниот ден посветен на Света Марена, да ни е на помош и да ни дарува здравје, многу радост, среќа, благосостојба, стои во кусата честитка.

Инаку, селото Туминец е едно од деветте населени места во Мала Преспа. Се наоѓа на самиот брег на Преспанското Езеро во близина на граничниот премин Стење – Горица и е второ село по големина, со околу 800 жители.

Овој преубав манастирот датира од 18 век, а обновен е во 1926 година. Се наоѓа на самиот брег од Преспанското Езеро, покрај местото наречено Писан Камен, локација која самата по себе му дава дополнителна убавина и привлечност.

©Македониум