МАЕИ им честита на новата македонска влада и премиерот Христијан Мицкоски

– June 26, 2024Posted in: Politics

Со голема чест и задоволство, Македонската алијанса за европска интеграција (МАЕИ), единствената партија која што ги брани интересите на Македонците во Албанија, упатува срдечни честитки до новоизбраната македонска Влада под водство на премиерот Христијан Мицкоски. Ова е значаен момент за нашата матична земја и ние, Македонците во Албанија, го споделуваме чувството на гордост и надеж за посветла иднина.

Сигурни сме дека под водството на премиерот Мицкоски, Република Македонија ќе продолжи да гради силни и здрави односи со своите соседи, особено со Република Албанија. Нашата визија е заедничка иднина заснована на братство, разбирање и взаемна почит, која ќе придонесе за унапредување на сите сфери на соработка.

Од новата македонска и албанска влада, со цел зацврстување на врските меѓу нашите земји и заштита на правата на македонската заедница во Албанија, очекуваме:

1. Потпишување на Договор за положбата и правата на Македонците во Албанија и на Албанците во Македонија, на реципроцитетна основа.

2. Договор за 24-часовно функционирање на граничниот премин Џепиште-Требиште во областа Голо Брдо.

3. Отворање на Генерален конзулат на Република Македонија во градот Корча, кој ќе биде во директен контакт со Македонците од Округот на Корча.

Исто така, силно се спротивставуваме на грубото мешање на Бугарија во местата каде што живеат Македонци, кои Софија ги смета за „Бугари“, иако во Албанија нема такви! Поради ова, бараме поддршка од Владата на Република Македонија во заштита на положбата и правата на Македонците во Албанија и за спречување на обидите за денационализација.

На крајот, МАЕИ искрено му посакува на премиерот Христијан Мицкоски и неговата администрација успех и мудрост во водењето на Македонија кон посветла и попросперитетна иднина. Со нетрпение очекуваме заедничка работа во зајакнувањето на врските помеѓу Македонците од Албанија и нашата матична држава Македонија.

Македонска алијанса за европска интеграција (МАЕИ)